FIPA, siglas para Federación Iberoamericana de Produtores de Agregados.
A FIPA, con domicilio na Travesía de Téllez, 4 entreplanta esquerda, na cidade de Madrid, é unha entidade sen fins de lucro, que desenvolve a súa actividade en España, Portugal e en todos os países da América Latina e do Caribe.

As autoridades da FIPA son a Asemblea Xeral, o Presidente e o Secretario Xeral.
O Presidente é D. Roberto L. Cuevas La Vera, da Cámara Mineira de Panamá.
O Secretario Xeral é D. Carlos Fernando Forero Bonell, de ASOGRAVAS (Asociación Colombiana de Produtores de Agregados Pétreos) - Colombia.
O Director Xeral é D. César Luaces Frades, da Federación de Áridos - FdA - España.

Hogano a FIPA conta con representantes de diferentes países como: España, Portugal, Costa Rica, Panamá, Rep. Dominicana, Porto Rico, Colombia, Ecuador, Perú, Venezuela, Brasil, Arxentina, Chile e Bolivia.
Poden ser membros da Federación as asociacións ou entidades declaradas e recoñecidas a nivel nacional que representen os intereses do sector dos áridos; tamén poderá ser membro da Federación unha empresa, que se clasificaría, neste caso, como asociación representativa do sector de produción de áridos por parte deste país se non existise unha asociación representativa do sector.
Actualmente son membros: a Cámara Mineira de Panamá, a Cámara Mineira da Costa Rica, a Asociación de Produtores de Agregados da República Dominicana, a Federación de Áridos de España, a Cámara da Pedra da Provincia de Bs As, a Asociación Brasileira de Produtores de Agregados para Construción ANEPAC; a Asociación Colombiana de Produtores de Agregados Pétreos- ASOGRAVAS, CEMEX de México e Agregados de Guatemala.
As linguas oficiais da Federación son o español e mais o portugués.

A Federación ten como fins promover os intereses comúns das empresas representadas a través das súas respectivas asociacións ou entidades nacionais e representar e promover os intereses do sector dos áridos (agregados) con obxecto de facer comprender e de salientar o seu valor económico e mais a súa responsabilidade social.

Os seus obxectivos constitutivos son:

1. Potenciar a constitución de asociacións ou entidades de produtores de áridos; promover, tanto nos países sede dos seus membros como noutros, a afiliación de entidades segundo os presentes estatutos.

2. Representar os produtores iberoamericanos de áridos ante as institucións internacionais apropiadas, presentando ante elas as iniciativas, obxectivos e peticións pertencentes ó sector dos áridos, e tamén cooperar con tales institucións no que poida beneficiar á Federación e ás asociacións ou entidades membro.

3. Cooperar cos gobernos dos países iberoamericanos, nas tarefas similares que redunden en beneficio do sector dos áridos.

4. Observar os diferentes procesos que poidan afectar ó sector dos áridos, como procesos lexislativos e normativos, e tratar de influír activa e responsablemente sobre estes procesos, para ter resultados razoables e prácticos que permitan que as empresas do sector operen de forma rendible e manteñan ou melloren a súa competitividade.

5. Establecer vínculos de relación, cooperación e información con outras entidades similares ou relacionadas co sector da construción, e promover a celebración de foros, seminarios, simposios, xornadas e congresos iberoamericanos relacionados co sector.

6. Propiciar a investigación e mais o desenvolvemento de tecnoloxía na produción de áridos (agregados) co propósito de facer máis competitiva a actividade dos seus membros.

7. Fomentar e establecer mecanismos de consulta, análise, investigación e desenvolvemento de programas que permitan ós seus asociados ser competitivos para aproveitar as vantaxes e beneficios que ofrecen os acordos internacionais.

8. Manter unha base de membros o máis ampla e representativa posible, reunindo as asociacións nacionais que representan o sector dos áridos, e establecendo unha canle de comunicación para intercambiar información, programas, proxectos, iniciativas, experiencias e ideas.

9. Propiciar, facilitar e auspiciar que o desenvolvemento do sector dos áridos (agregados) estea enmarcado dentro dos esquemas actuais de desenvolvemento sostible difundindo normativas e códigos técnicos e identificando, codificando, promovendo e difundindo os métodos máis axeitados en relación coa seguridade e saúde no traballo e no medio ambiente.

10. Recompilar e difundir estatísticas apropiadas e información técnica sobre o sector e os seus produtos.

11. Promover, cando sexa preciso, a creación de comités permanentes e grupos de traballo a fin de acometer de maneira efectiva e eficiente as necesarias actuacións da Federación.

12. Contribuír co proceso de formalización e legalización da industria extractiva dos áridos nos países onde se presenten actividades que non cumpran coas normas ou regulacións establecidas polas autoridades gobernamentais.

13. Propiciar centros de ensino e capacitación, edición e publicación de estudos técnicos sobre áridos.

14. En termos xerais, levar a cabo calquera acción de natureza similar que se considere necesaria ou apropiada para a Federación.